Кыргызстандын Куралдуу күчтөрүнүн Башкы штабы быйылкы аскерий абалдын күнгөй-тескейин талдап, жыйынтык чыгарат. Талкуу бүгүн Кой-Таштагы Аскерий даярдыктар базасы борборунда өтөт. Уюштуруучулардын маалыматына ылайык, жетекчилердин жана адистердин катышуусундагы жыйында аскер тармагынын кемчиликтери жана ийгиликтери ортого салынып, 2017-жылдын пландары каралат.
Эл аралык Global Firepower аскердик-аналитикалык порталынын быйылкы рейтингинде Кыргызстандын Куралдуу күчтөрү 126 мамлекеттин ичинен 110-орунду ээлеген. 2015-жылкы изилдөөдө 78-тепкичте болчу.
Уюмдун эсебинде, кыргыз армиясында жалпысынан 150 танк, 438 бронетранспортер, 159 оор техникасы жана 21 аскерий учак бар. (SE)