АКШнын шайланган президенти Дональд Трамп президенттик шайлоо учурунда Орусия жасады делген хакердик чабуул боюнча жаңы маалымат алганын айтып чыкты. Трамп бул маалыматтарды кийинки аптада жарыялоону көздөөдө. Флорида штатында жаңы жылдык кечеде сүйлөп жатып, Кошмо Штаттардын шайланган президенти хакердик чабуулдар боюнча “башкалар билбеген маалыматты билерин” айтты.
"Бул маалыматты кийинки шейшемби же шаршембиде шардана кылам”-деди Трамп.
Ал ошондой эле АКШнын Демократиялык партиясынын мүчөлөрүнүн электрондук почтасына чабуулду Орусиядан башка күчтөр жасашы мүмкүн экенин кошумчалады.
Ушул аптада АКШ бийлиги хакердик чабуулдар үчүн орусиялык бир катар жетекчилерге санкцияларды киргизип, 35 дипломатты өлкөдөн чыгаруу чечимин кабыл алган. Кошмо Штаттардын атайын кызматтары чабуулдарды Москва Трамптын президенттик шайлоодо жеңишке жетишине жардам берүү үчүн уюштурган деп шектенүүдө. Орусия мындай айыптоону четке кагууда.
