Кыргызстанда үй-бүлөдөгү зомбулуктан аялдар гана эмес, эркектер да жабыркоодо. Бул тууралуу Ош шаарында өткөн коомдук талкууда айтылды.
Талкууга Жогорку Кеңештин депутат аялдарынан турган топ катышты.
Депутат Рада Туманбаева үй-бүлөлүк зомбулуктан жабыркагандар боюнча статистикада аялдар 58 %, балдар 18%, улгайгандар 15% жана эркектер 7% түзөрүн айтып берди.
Ал эми Оштогу «Аялзат» бейөкмөт уюмунун жетекчиси Наргиза Ештаева 2015-жылы жардамга муктаж аялдардын 3524 милицияга арызданса, 8458и кризистик борборлорго кайрылганын айтты.
Иш-чарада айтылгандай, учурда үй-бүлөлүк зомбулукка каршы мыйзам долбоору иштелип чыгууда, эгер ал кабыл алынып ишке кирсе, кризистик борборлорду каржылоого республикалык бюджеттен 25 миллион сом бөлүнөт. (RK)
