Кыргызстандын транспорттук прокуратурасы республиканын аймагында жайгашкан аэродромдордун тегерегине салынган курулуштардын мыйзамдуулугун текшере баштады. Бул тууралуу бүгүн Башкы прокуратурадан кабарлашты.
Биринчилерден болуп текшерүүгө алынган «Баткен» жана «Жалал-Абад» аэродромдорунун жанында жер тилкелери мыйзамсыз берилип, 20дан ашуун курулуш тургузулганы белгилүү болду.
Ал эми бул аэродромдор өзүлөрү 1970-жылдары курулганы менен алигүнчө шаардын башкы планына кире электиги аныкталды.
Учурда текшерүү иштери башка облустарда да жүрүп жатат.
Быйыл 16-январда "Манас" аэропортунун жанындагы Дача СУ айылына учак кулап, 39 адамдын өмүрү кыйылган. (RK)
