Ооганстандын Лагман провинциясынын Баад Пах районунда белгисиз адам бир үйгө колго жасалган эки гранатаны ыргытып, андан бир үй-бүлөнүн 11 мүчөсү мүрт кетти.
Провинциянын расмий өкүлдөрү кабарлагандай, 19-февралдын түнүндө болгон окуядан набыт болгон жайкын тургундардын арасында аялдар жана балдар да бар. Үй-бүлөнүн үч өкүлү жаракат алганы кабарланды.
Чагымчыл кол салуу Кабул-Жалалабад жолунун түндүгүндөгү Марват Касе аймагында болгон. Аны ким, эмне максатта уюштурганы азырынча айтыла элек.
