Британиянын мурдагы премьер-министри Тони Блэр Брекситке каршы күрөшүү үчүн саясатка кайтып келгенин жарыялады. Ошол эле маалда ал 8-июнда өтө турган парламенттик шайлоого катышпастыгын белгиледи.
1997-2007-жылдары Британиянын премьер-министри болуп турган Тони Блэр башынан эле падышачылыктын Евробиримдиктен чыгышына каршы болгон.
"Брексит мага саясатка активдүү киришүүгө түрткү болду. Мен тарыхый учурда окуяларга сырттан көз салып тургум келбейт",-деди ал Daily Mirror гезитине 1-майда курган маегинде.
Британдыктардын 54% өткөн жылдын 23-июнунда болгон референдумда Евробиримдиктен чыгуу үчүн добуш берген.