Башкы прокуратура Чүй облусунун Аламүдүн районунун Беш-Күңгөй айылдык милиция кызматкерлерине карата Кылмыш-жаза кодексинин 305-1-беренеси (кыйноо) жана 305-беренеси (кызмат абалынан аша чабуу) боюнча кылмыш ишин козгоду.
Маалыматка караганда, Башкы көзөмөл органы жергиликтүү жарандын милиция кызматкерлеринин үстүнөн жазган арызын текшерген. Анын жыйынтыгында 12-майда Беш-Күңгөй айылдык милиционерлери аккумулятор уурдоо фактысына байланыштуу бул жаранды бөлүмгө алып барып, моюнга алдыруу үчүн кыйнаганы, колуна кишен, башына желим баштык кийгизип, ур-токмокко алганы аныкталган.
Кылмыш ишин иликтөө УКМКнын Тергөө башкармалыгына өткөрүлүп берилди. (NT)
