Кыргызстанда президенттикке ат салышуу ниетин билдиргендердин саны төрткө жетти. Борбордук шайлоо комиссиясынын маалыматына караганда, бүгүнкү күнгө карата саясий партиялардан бир жана өзүн өзү көрсөткөндөрдөн үчөөнөн арыз түштү.
Алар: “Ак Шумкар” партиясы көрсөткөн мурдагы премьер-министр Темир Сариев жана өзүн өзү көрсөткөн “Ата Мекен” партиясынын лидери Өмүрбек Текебаев, “Лига-антикризис” борборунун төрагасы Назарбек Нышанов жана “Аурдин” ишканасынан директору Арстанбек Абдылдаев (Арстан Алай).
Президенттик шайлоо быйыл 15-октябрда өтөт. Талапкер болууну каалагандардан арыздар 1-агустка чейин кабыл алынат.
Бийликчил социал-демократтар партиясынын талапкерди көрсөтүү съезди 15-июлда өтөт. Буга чейин КСДПнын саясий кеңеши азыркы премьер-министр Сооронбай Жээнбековду президенттикке сүрөй турганын жарыялаган. (RK)
