Ош жана Жалал-Абад облустарында быйыл жазындагы жаратылыш кырсыктарынан жабыркаган айылдарда социалдык мекемелердин курулушу бүгүн башталат. Бул тууралуу Архитектура, курулуш, турак жай жана коммуналдык чарба мамлекеттик агенттигинен билдиришти.
Маалыматка караганда, Ош облусунун Чоң-Алай районунда эки мектеп, эки оорукана, Өзгөн районунда төрт мектеп жана Жалал-Абад облусунун Сузак районунда бир мектеп салынат. Курулуш иштерин 5-ноябрга чейин бүткөрүү максат кылынууда.
Быйыл жазында жаанчыл аба ырайынан улам Жалал-Абаддын Сузак, Оштун Өзгөн райондорунда жер көчкү жана сел жүргөн. Өзгөн районунун Аюу-Сай айылында жети үй жана 24 адам топурак алдында калган. Ал эми 3-5-майда Чоң-Алай районунда күчү очогунда 5-7 баллга чейин жеткен жер титирөө болуп, андан 500дөн ашык үй-бүлө жабыркаган, ондогон турак жайлардан, социалдык объекттерден жарака кеткен. (NT)
