Президент Алмазбек Атамбаев бүгүн өлкөнүн руханий өнүгүшүнө салым кошкон адамдарды сыйлап жатып, Кыргыз эл артисттери Зейнеп Шакеева менен Алтынбек Сапаралиев жөнүндө айтып өттү.
- Эсимде бар, Алтынбек Сапаралиевди туурап «Пиалада кантың бар» менен «Стамбулдун кыздарын» айылдагы жигиттердин баары, орустар да кошо кыңкылдап жүрчү. Зейнеп эженин аткаруусундагы «18 жаш» менен «Чагылган» болсо, кыз-келиндердин оозунан түшчү эмес. Азыр да Зейнеп эженин ошондогу аткаруусу жүрөктү эзип кетет, - деп кошумчалады ал.
Мамлекет башчысы бүгүн сыйланган кыргызстандыктар - элибиздин сыймыгы экендигин баса белгиледи.
Мамлекеттик сыйлыктар менен кошо 133 адамдын ар бирине 10 миң сомдон акчалай белек тапшырды. (SDz)
