Рахат 17 жашта. Он гүлүнүн бири ачыла элек кыздын оюнга тойбой турган курагы. Бирок курбулары менен көңүл ачып, кылыктанууга убактысы да, чамасы да жок, бир үй-бүлөнүн түйшүгү анын мойнунда. Рахат Тажикстандын Мургаб районунан көчүп келген кайрылман үй-бүлөнүн таянаар тоосу. Апасы оорудан каза болгондон кийин оорукчан эжесине, эки инисине баш-көз болуу үчүн мектепти да таштаган. Аларды багуу үчүн талаада жер тытмалап, отоодо да иштеген.