12-сентябрдан тарта "Кайыңды-Кант" заводу Токмок шаарында, Кемин районунда жана Ысык-Ата районунда кант кызылчасын кабыл алуучу түйүндөрүн ишке киргизип, дыйкандардан кызылча кабыл ала баштады. Ал эми Беловодск, Маймак, Кайыңды аймактарында, Кант, Кара-Балта шаарларында, Шопоков шаарчасындагы кабыл алуучу түйүндөр 1-октябрдан тарта ишке киришет.
2016-жылы Кыргызстанда 710 миң тонна кант кызылчасы өндүрүлгөн. Быйыл 16 миң гектар жерге кант кызылчасы айдалган, бул өткөн жылга салыштырмалуу 4 гектарга көп. Алдын ала маалыматтар боюнча, быйылкы жылы 850-900 миң тонна түшүм жыйналат.
Өткөн жылы орус-кыргыз өнүктүрүү фондунун каржылык жардамы менен "Кошой" кант заводу ишке кирген. Бул ишканага аталган фонд 10 млн доллар жеңилдетилген насыя берсе, "Кайыңды-Кант" заводуна 5,5 млн доллар берилген.
Бир нече жыл мурун кыргызстандык дыйкандар өстүргөн кант кызылчасын кайра иштетүүчү ишканалар албай, коңшулаш Казакстанга сатууга же чочкого тоют кылып салып берүүгө аргасыз болушкан. (ZKo)
