Казакстандык 23 жаштагы теннисчи Зарина Дияс Жапониянын ачык чемпионатын утуп, Аялдардын теннис ассоциациясы (WTA) уюштурган мелдештерде жеңүүчү атыккан биринчи борборазиялык спортчу болуп калды.
Ал жекшембиде Токиодо өткөн финалда жапониялык Мию Катону 6-2, 7-5 эсебинде жеңип чыкты.
Аял теннисчилердин арасында 100-орунда турган Дияс 2014-жылы да Жапониянын ачык чемпионатында финалга чейин жеткен. Бирок анда титулду жапониялык Наоми Осакага уттуруп жиберген.
