БШКнын маалыматына караганда, Коомдук телеканалда дебаттардын биринчи бөлүгү бүгүн башталат. Бул күнү жадыбал боюнча президенттикке талапкерлер Азимбек Бекназаров, Бакыт Төрөбаев, Адахан Мадумаров дебатка чыгышы керек. 4-октябрда Сооронбай Жээнбеков, Токтайым Үмөталиева, Арстанбек Абдылдаев жана Өмүрбек Бабанов, 5-октябрда Темир Сариев, Эрнис Зарлыков, Таалатбек Масадыков, Арсланбек Малиев менен Улукбек Кочкоровдун теледебаты болот.
КТРКда дебаттардын экинчи бөлүгү 11-12-октябрга белгиленген. Токтайым Үмөталиева, Таалатбек Масадыков, Арстанбек Абдылдаев, Улукбек Кочкоров, Камчыбек Ташиев жана Өмүрбек Бабанов 11-октябрда чыгат. Азимбек Бекназаров, Адахан Мадумаров, Эрнис Зарлыков, Арсланбек Малиев, Бакыт Төрөбаев жана Сооронбай Жээнбековго 12-октябрь туш келген. Бул дебаттарда ар бир талапкерге 20 мүнөттөн убакыт берилет. Ал эми 21-29-сентябрда талапкерлер өзүнчө чыгып сүйлөө үчүн 15 мүнөттөн акысыз эфир алышкан. БШК дебат жадыбалын талапкерлер арасындагы чүчүкулак аркылуу аныктаган.
Кыргызстанда 15-октябрда өтө турган президенттик шайлоодо ат салышуу үчүн 13 талапкер катталган. Өткөн жумада алардын бири Камчыбек Ташиев саясий жарышка катышуудан баш тарткан. (NT)
