Президент Хасан Роухани Ирандын жер титирөөдөн жапа чеккен Керманшах провинциясына 14-ноябрда барып, өкмөт жаратылыш кырсыгынан кийинки маселелерди кыска мөөнөттө чечиш үчүн колунан келишинче аракет кылаарын айтты. Эки күн мурдагы катуу жер титирөөдөн каза тапкандардын саны 430 адамга жетип, 7 миңден ашык киши жарадар болгонун Ирандын мамлекеттик медиасы билдирди.
Ирактын түндүгүндөгү көбүнесе күрттөр байырлаган аймакта 7 киши каза тапканы, 530дан ашууну жаракат алганы кабарланды.
12-ноябрдын кечиндеги күчү 7,3 баллга жеткен зилзаланын очогу Ирактын Халабжа шаарынан түштүк-батышты көздөй 32 чакырым алыстыкта жайгашкан. Жер титирөө Түркиядан Кувейтке чейинки аймактарда сезилген.
Иран-Ирак чегиндеги миңдеген жергиликтүү тургундар экинчи түндү да чатырларда өткөрүштү.
Ирандагы жер титирөөнүн кесепети
