Талас облусунун Кара-Буура районуна караштуу Кызыл-Адыр айылында тогузунчу класстын окуучусу асынып алды.
Бул маалыматты жергиликтүү тургундар "Азаттык" радиосуна билдиришти. Маалыматка караганда, өспүрүм Субанбеков атындагы орто мектепте окуган.
Баланын ата-энеси Казакстанда болгондуктан, ал таенеси менен жашап жүргөн. Окуянын чоо-жайы боюнча мектеп директору жана милиция комментарий бере элек.
Ушуну менен Талас облусунда бир жума ичинде эки окуучу өз жанын кыйды.
11-декабрда Талас районундагы Шабданбек Жумагулов атындагы лицей-интернаттын 9-классынын окуучусу Аяна Огунованын сөөгү өз үйүндө асынган абалда табылган. Кыздын жакындары бул үчүн анын мугалимин күнөөлөп, мектеп жетекчилиги ага коюлган дооматты четке кагып жатат. (AlS)