Тажикстандын шайлоо аркылуу бийликке келген биринчи президенти Рахмон Набиевдин жесири өрттөн каза тапты. 80 жаштагы Мариям Набиева 28-декабрда өлкөнүн түштүгүндөгү өз үйүндө чыккан өрттөн ажал тапканын анын жакындары "Азаттыктын" тажик кызматына билдирди.
Бийлик өкүлдөрү тилсиз жоого эмне себеп болгонун айта элек. "Кимдир-бирөө атайылап от коюшу мүмкүнбү?" деген суроолор да жоопсуз калууда. Учурда иликтөө жүрүп жатканы белгилүү болду.
Рахмон Набиев 1991-жылы Тажикстан эгемендигин жарыялагандан эки айдан кийин өлкөнүн президенти болуп шайланган. Ал бир жылдан кийин, 1992-жылдын март айында башталган жарандык согуш маалында каршылаштарынын кысымынан улам кызматын тапшырып кеткен.
Набиев 1993-жылы апрель айында жүрөгү кармап каза болгону кабарланган.
