Москванын Тверской райондук соту британ жараны, "Hermitage Capital" инвестициялык фондунун башчысы Уильям Браудерди 9 жылга сыртынан абакка кести. Браудер - орус адвокаты Сергей Магнитский 2009-жылы Орусиянын тергөө абагында көз жумгандан кийин Москвага каршы санкция киргизүү демилгесин көтөргөндөрдүн бири.
Сот Браудерди 90-жылдары "компанияларды атайын банкротко жетелеген", "салык төлөөдөн качкан" деп тапты. Ошондой эле Браудердин жана аны менен кошо соттолуп, сегиз жылга сыртынан кесилген өнөктөшү Иван Черкасовдун мүлкүн тартып алып, мамлекеттин эсебине 4 миллиард рубль өндүрүүнү да буюрду. Соттолуучулардын адвокаттары жогорку инстанцияларга арызданышарын билдиришти.
Эки айыпталуучу тең учурда Улуу Британияда жашашат. 2013-жылы да Браудер "жарым миллиард рублдук салыкты төлөгөн эмес" деген айып менен жылга сыртынан кесилген. Ал орус бийлигинин айыптарын четке кагып келет.
