Еврокеңештин жана Европа комиссиясынын төрагалары Доналд Туск менен Жан-Клод Юнкер Улуу Британияга Евробиримдиктен чыкпоону сунуш кылды. Туск Европарламентте:
- Эгер Лондон болуп жаткан нерселерге көз карашын өзгөртпөсө, Брексит кесепеттер менен ишке ашат. Улуу Британия үчүн биздин жүрөгүбүз мурдагыдай эле ачык, – деди.
Юнкер Тусктун позициясын колдоп, британ бийлиги анын сөзүнө кулак салат деген үмүтүн билдирди.
Улуу Британиянын Евробиримдиктен чыгышы боюнча сүйлөшүүлөр Брюсселде 19-июнда башталган. Ал 2018-жылдын аягына чейин уланат. Ошондон кийин макулдашууларды улуттук парламентте ратификациялоо үчүн тараптарга алты ай берилет.
Британиялыктар Евробиримдиктен чыгуу боюнча 2016-жылы добуш берген. Улуу Британия Европа Биримдигине 1973-жылы кошулган жана анын катарынан чыккан алгачкы өлкө болуп калмакчы.
