Бишкек шаарында, Ысык-Көл жана Чүй облустарынын аймактарында суу ташкынын азайтуу, дарыялардын нугун калыбына келтирүү иштери уланууда.
Өзгөчө кырдаалдар министрлигинин басма сөз кызматы билдиргендей, 31-январда кечке жуук Бишкектин четиндеги Ала-Арча суусу ташып, эки турак үйдү жана бир кампаны каптаган. Министрликтен жана жергиликтүү бийликтен техника бөлүнүп, абалды жөнгө салуу уланууда.
Ысык-Көлдүн Жети-Өгүз районундагы Кызыл-Суу сайы тоңуп, суунун нугу бурулуп, 31-январда Кызыл-Суу айылында эки үйдүн короосун жана чарбалык курулуштарын каптаган. Жергиликтүү "Тазалык" ишканасы музду жарып, сууну тарткан.
Чүйдүн Жайыл районунун Суусамыр айыл аймагында да Шорго-Булак суусу тоңуп, 29-январда Тунук айылындагы алты турак жайдын короосун каптаган. Тазалоо иштери уланууда.
Чүй айылында жер кыртышындагы суунун деңгээли көтөрүлүп, аны басаңдатуу иштери жүрүп жатат. (SE)