Аксы районунун борбору Кербен шаарында машинеси менен мугалимдерди коюп кеткен милиция кызматкерине кылмыш иши козголуп, ал эки айга камакка алынды.
Бул тууралуу Жалал-Абад облустук ички иштер башкармалыгы билдирди. Маалыматка караганда, "ВАЗ -2107" үлгүсүндөгү автоунааны башкарган милиционер 11-февралда Кербенде жол четинде бара жаткан төрт кишини коюп кеткен.
Кырсыктан эки аял каза таап, дагы экөө оор абалда ооруканага жаткырылган. Алар райондогу №52 Мамай орто мектебинин мугалимдери экени аныкталган.
Ооруканадагы мугалимдердин биринин абалы оор экени жана реанимацияда жатканы кабарланды. Экинчиси буту сынып, Жалал-Абад облустук ооруканага жиберилген. (RsK)
