Эртең, 3-мартта президент Сооронбай Жээнбековдун президенттик кызматка киришкенине 100 күн болот. Президенттин басма сөз катчысы Толгонай Стамалиева “Азаттыкка” берген интервьюсунда бул аралыкта Жээнбековдун ишмердүүлүгү тууралуу ой-пикири менен бөлүштү.
Ал президент инаугурацияда ант бергенден бери коомчулук өлкө башчынын ишин кунт коюп байкап келатканын айтып, өз кезегинде президент шайлоо алдында берген убадаларын четинен аткарып келе жатканына токтолду.
- Президент Сооронбай Жээнбеков шайлоо алдындагы убадаларынын бири катары өлкө аймактарын жана экономикасын өнүктүрүүнү айткан. Ушундан улам 2018-жыл Аймактарды өнүктүрүү жылы деп жарыяланды. Анын алкагында жумушчу топтор түзүлүп, реалдуу кыймылдар башталды.
Ал ошондой эле президент аймактарга иш сапары менен барып, жер-жерлердеги абал менен таанышып жатканын билдирди.
Сооронбай Жээнбеков Кыргызстандын президенттик кызматына 2017-жылдын 24-ноябрында киришкен. Ал КСДП партиясынан президенттикке талапкер катары көрсөтүлүп, шайлоочулардын 54% добушуна ээ болгон. Шайлоодогу анын негизги атаандашы Өмүрбек Бабанов расмий жыйынтык чыгарылгандан кийин өлкөдөн чыгып кетсе, Башкы прокуратура Бабановго кылмыш ишин козгогон. Кийинчерээк Бабанов саясаттан толугу менен кеткенин жарыялаган. (SDz)
