Президент Сооронбай Жээнбеков Орусиядагы президенттик шайлоодо азыркы президент Владимир Путиндин жеңишин каалайт. Президент бул тууралуу 6-мартта маалымат каражаттарынын жетекчилери менен жолугушуу учурунда билдирди.
Жээнбеков "Путин Орусиянын экономикалык жана коргонуу мүмкүнчүлүктөрүндө ийгилик жаратууда" деди. Ал ошондой эле Орусия эл аралык аренада чоң кадыр-баркка ээ экенин айтты.
2010-жылдан бери кыргыз бийлиги Орусияны ишенимдүү өнөктөшү катары санап жүрөт. Владимир Путин 2000-2004-жылдары президент болуп шайланган. 2008-жылдан 2012-жылга чейин орус өкмөтүн жетектеп, 2012-жылы үчүнчү жолу президенттик такка отурган.
Орусияда 2018-жылдын 18-мартында президенттикке шайлоо өтөт. Ага сегиз талапкер ат салышып жатат. (TSh/AsK)
