Таш-Көмүр шаардык кеңеши мэрлик кызматка Рахматилла Асаналиевди шайлады. Депутаттардын сессиясы 7-мартта болгонун мэриянын өкүлдөрү “Азаттыкка” билдиришти.
Шаардын башчылыгына КСДП фракциясынан Бусурманкул Субаналиевдин, "Мекеним-Кыргызстандан" Рахматилла Асаналиевдин талапкерлиги көрсөтүлгөн. 21 депутат Асаналиевди колдоду.
31 мандаттуу Таш-Көмүр шаардык кеңешинин 2016-жылдын ноябрь айында, 2017-жылдын май айында шайланган эки чакырылышынын депутаттары мэр шайлоодо бириге албай, эки жолу мөөнөтүнөн мурда таратылган. Бул аралыкта мэрдин милдетин аткаруучу болуп Өмүржан Бабатаев иштеди.
2018-жылдын январындагы шайлоодо шаардык кеңешке беш партия келген. Алар: “Мекеним Кыргызстан”, “Өнүгүү”, “Ата-Журт”, КСДП жана “Таш-Көмүр жаштары” партиялары. (RsK)
