Орусиянын бардык аймактарында президенттик шайлоодо добуш берүү аяктап, алгачкы экзит-поллдун (VTsIOM мамлекет каржылаган экзит-полл) жыйынтыгы чыга баштады. Ага ылайык, президент Владимир Путин 73,9 пайыз добушка ээ болууда. Экзит-поллдун жыйынтыгы туура чыкса, Путин буга чейинки шайлоолордон кыйла көп добуш алган болот.
Экзит-поллго ылайык, Коммунисттик партиядан Павел Грудинин 11,2%, Либералдык-демократиялык партиянын лидери Владимир Жириновский 6,5%, тележурналист Ксения Собчак 2,5% добуш алышы мүмкүн. Калган төрт талапкер бир пайыздын тегерегинде добуш топтойт деген божомол бар.
Ал эми Борбордук шайлоо комиссиясы бюллетендердин 21 пайызы саналып бүткөнүн, президент Путин 71,97 % менен алдыда келе жатканын билдирди.
Орусиянын Борбордук шайлоо комиссиясы Москва убактысы боюнча 18:00дө шайлоочулардын 60 пайызы добуш бергенин кошумчалады.
Шайлоого катыша албай калган оппозициячыл саясатчы Алексей Навальныйдын командасы элдин катышы расмий айтылгандан кеминде беш пайызга аз экенин кабарлап жатат.
Орусияда 18-марттагы президенттик шайлоого сегиз талапкер катышкан.
Талапкерлердин арасында төртүнчү президенттик мөөнөткө бараткан Владимир Путин, Коммунисттик партиядан Павел Грудинин, Либералдык-демократиялык партиянын лидери Владимир Жириновский, либерал саясатчы катары таанылган Григорий Явлинский, теле алып баруучу Ксения Собчак, ишкер Борис Титов, мурдагы депутат Сергей Бабурин жана Максим Сурайкин бар.