Бишкек Жылуулук электр борборундагы авариянын себептерин иликтеген депутаттык комиссия бүгүн жыйынтыктоочу жыйынга чогулуп, өз корутундусун жарыялайт. Мындай маалымат комиссиянын 2-апрелдеги отурумунда айтылды. Анда модернизациялоого кеткен чыгымдар талкууланып, тиешелүү жетекчилер Кытай тараптан бөлүнгөн акчанын сарпталышы тууралуу маалымат беришти.
Быйыл 26-январда Бишкек Жылуулук электр борборунда авария болуп, -20 градустан ашкан катуу суукта абоненттерге беш күн бою жылуулук берилген эмес.
Бул кырдаал жарым жыл мурун модернизацияланган жылуулук электр борборуна карата сын-пикирлерди күчөтүп, Кытай берген 386 миллион доллардын максаттуу сарпталганы суроо жараткан.
Авария боюнча Кылмыш-жаза кодексинин 316-беренеси ("Шалаакылык") менен кылмыш иши козголгон. Февралда түзүлгөн депутаттык комиссия авариянын чоо-жайы менен катар модернизацияга кеткен Кытай насыясын да иликтеп жатат. (NT)