Токтогул Сатылганов атындагы Улуттук филармонияда 4-апрелде боло турган иш-чара “Баатырларды эскерүү” деп аталат.
Аны уюштуруп жаткан “Айкөл Ала-Тоо” коомдук бирикмеси билдиргендей, кечеде театралдаштырылган спектакль коюлат. Андан кийин апрель окуясында курман болгондор эскерилет, сегиз жыл мурдагы бийлик алмашууга алып келген ыңкылаптын сабактары тууралуу сөз болот.
Ага премьер-министр баштаган бийлик өкүлдөрү да чакырылган.
«Айкөл Ала-Тоо» коомдук бирикмеси 2010-жылдын 7-апрелинде болгон окуяларда жабыркаган жарандардан түзүлгөн. Учурда ага 500дөй киши мүчө.
Сегиз жыл мурун 7-апрелде эл мурдагы президент Курманбек Бакиевдин үй-бүлөлүк башкаруу режимине каршы чыккан. Куралсыз элге ок атылып, 80ден ашык киши окко учкан. Жүздөн ашуун адам жарадар болгон. Президент үй-бүлөсү, жакындары менен чет мамлекетке качып, Беларустан башпаанек тапкан. Кыргызстанда 7-апрель "мамлекеттик майрам жана дем алыш" деп жарыяланган. (NT)