Автотранспортту каттоо жана айдоочулук күбөлүк берүү департаментинин Кызыл-Кыя шаардык башкармалыгынын кызматкерлери психикалык жактан оорулуу адамга мыйзамсыз айдоочулук күбөлүк берип жибергени аныкталды.
Бул тууралуу Экономикалык кылмыштарга каршы күрөш боюнча мамлекеттик кызмат кабарлады.
2016-жылы документ алган М.Н. аттуу жаран 2013-жылдан бери Кызыл-Кыя шаардык үй-бүлөлүк медициналык борборунун психикалык кабинетинде “кем акылдык” (приобретенное слабоумие) менен каттоодо турган. Ага карабай 2015-жылы нарколог-дарыгеринин тастыктамасы берилип, “Д” автомектебинин күбөлүгүнүн негизинде автотранспортту каттоо кызматкерлери айдоочулук күбөлүк берип коюшкан.
Факты боюнча Кылмыш-жаза кодексинин 350-беренесинин ("Документтерди жасалмалоо") жана 315-беренесинин (“Кызматтык жасалмалоо”) негизинде кылмыш иши козголду. Тергөө иштери уланууда.
Автотранспортту каттоо жана айдоочулук күбөлүк берүү департаменти Мамлекеттик каттоо кызматына карайт. (ErN)
