Бүгүн Борбордук шайлоо комиссиясынын отурумунда Гүлнара-Клара Саматка Жогорку Кеңештин депутатынын мандаты ыйгарылды. Бул тууралуу БШКнын маалымат бөлүмүнүн башчысы Жылдыз Шеримбекова кабарлады.
Атын Гүлнара-Клара Самат деп өзгөрткөн БШКнын мурдагы төрайымы Клара Кабилова "Ата Мекен" партиясынан мурдагы депутат Аида Салянованын ордуна келди.
Жылдыз Шеримбекова буга чейин Гүлнара-Клара Саматтын кош жарандыгы тууралуу маалымат кылдат текшерилгенин айтып, депутаттык күбөлүк бүгүнкү жыйында тапшырылганын билдирди.
Буга чейин «Ата Мекен» партиясынан Аида Салянованын ордуна депутат болуп келчүлөрдүн тизмесинде турган Гүлнара-Клара Саматтын орус жарандыгы болушу мүмкүн экени айтылып, "Карек" коомдук бирикмеси аны тактоону БШКдан өтүнгөн.
Клара Кабилова 2007-жылы БШКнын төрайымы болуп иштеген, мурдагы президент Курманбек Бакиевден ыдык көргөнүн айтып, Орусияда жашап жүргөн. Кийин ысымын өзгөртүп Гүлнара-Клара Самат болгон. Ал эми Аида Салянованын мандаты быйыл марттын башында алынган. Тизмеде кийинки орунда Ташболот Балтабаев турат. (KR)
