Пакистанда Кошмо Штаттарга алмашуу программасы менен барып, өткөн аптада Техастагы атышууда курман болгон кыздын сөөгү жерге берилди. Бир күн мурда анын сөөгү өзү туулуп-өскөн Карачи шаарына жеткирилген.
17 жаштагы Сабика Шейхти акыры сапарга узатуу зыйнатына жергиликтүү бийликтин өкүлдөрү жана АКШнын Пакистандагы элчиси да катышты. Шейх Техас штатынын Санте-Фе шаарындагы мектепте билим алып жаткан эле. 18-майда он кишини өлтүрүп, дагы онун жарадар кылган 17 жаштагы окуучу Димитриос Пагуртзис камакка алынган. Ага “Киши өлтүрүү” беренеси боюнча айып тагылды.
