Орусиянын Росатом ишканасынын «ТВЭЛ» отун компаниясы Өзбекстандын Илимдер академиясынын Өзөктүк физика институтунда иштетилүүчү ВВР-СМ изилдөө реактору үчүн өзөктүк отун жөнөттү.
Podrobno.uz басылмасына компаниянын басма сөз кызматы «Новосибирсктеги химиялык концентраттар заводунда өндүрүлгөн жылуулук чыгаруучу алты түтүктүү ИРТ-4М түзүлүшүнөн 56 даана жөнөтүлдү», – деп билдирди.
Отун өндүрүп бул реакторго жиберүү тууралуу келишимге 2017-жылдын ноябрь айында кол коюлган. Ошол эле жылы «Росатом» ишканасы менен Илимдер академиясынын ортосунда кызматташуу макулдашылган. Келишимде өзөктүк технологияларды иш жүзүндө колдонуу жана кадр даярдоо сыяктуу багыттар жазылган.
ВВР-СМ изилдөө реактору Өзбекстанда 1959-жылдан бери иштейт. (RK)
