Линктер

ишемби, 22-сентябрь, 2018 Бишкек убактысы 13:49

Иран: Полиция нааразылыкка чыккандарга газ чачты


Тегерандын эски базарындагы демонстранттар, 25-июнь, 2018-жыл.

Тегеранда полиция парламент имаратын карай жүрүш жасагандарга көздөн жаш агызган газ чачыратты. Күтүүсүз жерден уюшулган нааразылык дүйшөмбүдө эртең менен шаардагы Чоң базардын алдында чыккан. Көмүскө базарда өкмөттүн колдоосуна карабай Ирандын акчасы - риалдын 10% кунун жоготкону адамдардын нааразылыгын пайда кылган.

"Азаттыктын” Иран редакциясына келген видеодо кыжырданган жүздөгөн демонстрант Чоң базардын тегерегине топтолуп, акча алмаштырган күркөлөрдү жаап салууну талап кылышкан. Ошондой эле “Сирияны коюп бизди ойлогула” деп кыйкырып жатышканын көрүүгө болот.

Ирандын Борбордук банкынын жетекчиси Валиулла Сейф риалдын нарксызданышын кийинки аптада “экинчи акча алмаштыруучу базардын” ачылышына байланыштуу көмүскө рыноктогу валюта саткандардын кармашы менен түшүндүрдү. Ал президент Хасан Роухани жана экономика министри баштаган расмий адамдар менен жолуккандан кийин жаңы базар АКШ долларына карата ар кандай курска негизделерин билдирди.

Роуханинин администрациясына жакын саналган Иран студенттеринин жаңылыктар агенттиги (ISNA) бир доллардын алмашуу курсу 60-65 миң риалга барабар деп жарыяланарын 25-июнда кабарлады.

Былтыр жыл этегинде Иранда тамак-аштын, азык-түлүктүн кымбатташына, башка экономикалык көйгөйлүү маселелерге байланышкан нааразылык жыйындары өлкөнүн ар кайсы шаарларында тутанган. Бир аптадан ашкан нааразылыктар учурунда кеминде 22 адамдын өмүрү кыйылып, 1700дөн ашуун киши камакка алынган.

XS
SM
MD
LG