Украинада "мамлекеттик каражатты туура эмес пайдаланган" деген кине менен издөө жарыяланган мурдагы коргоо министри Михаил Ежел Беларустан саясий баш калка алды.
Киевдин Соломянка райондук соту Ежелди сыртынан соттой баштаган. Экс-министр үй-бүлөсү менен Минскте саясий качкын макамында жашайт.
Ал 2010-жылдын мартынан 2012-жылдын февралына чейин коргоо министри, 2013-жылдын майында Беларуска элчи болуп дайындалган.
2014-жылы орусиячыл президент Виктор Янукович элдик толкундоонун аркасында бийликтен кеткен. Ыңкылаптан кийинки украин бийлиги Ежелге мамлекеттик казынадан 43 миллион гривни (1.6 млн. доллар) "жеп алган" деген айып койгон.
2015-жылы президент Петр Порошенко Ежелди элчилик кызматтан алган, бирок мурдагы министр мекенине кайтып барган эмес.