Балдардын укуктарын коргоочулар Билим берүү жана илим министрлиги менен кошо "Баламды мектепке кабыл алып коюңуз" аттуу акцияны баштады. Акциянын максаты - балдардын мектепке кирип, билим алышына көмөктөшүү.
Бул тууралуу акциянын уюштуруучусу "Балдарды коргоо лигасы" коомдук фондунун жетекчиси Назгүл Турдубекова “Азаттыкка” билдирди.
Турдубекованын айтымында, акция балдарын мыкты мектептерге орноштурууга шарты жок ата-энелерге жакшы мүмкүнчүлүк берет. Ал ишке киргенден берки аралыкта үч миңден ашуун ата-энеге балдарын мектепке орноштуруу боюнча укуктук кеңештер жана жардам берилген.
Акция Кыргызстанда он жылдан бери өткөрүлүп, окуу жылынын башында балдарын мектепке киргизе албай жүргөн ата-энелерге укуктук жардам жана кеп-кеңеш берилип жүрөт. Былтыр акциянын алкагында 3 миңден ашуун ата-энеге кеңеш берилип, алардын 300үнө жардам көрсөтүлгөн. (КЕ)