Мурдагы президент Курманбек Бакиевдин үй-бүлөсүнүн финансылык кеңешчиси болгон Евгений Гуревичтин айткандары боюнча парламентте маселе көтөрүлөт.
Бул тууралуу парламенттеги “Ата Мекен” фракциясынын жетекчиси Алмамбет Шыкмаматов “Азаттыкка” билдирди. Депутат 2015-жылдары прокуратуранын кайсы кызматкерлери Гуревич менен жолугушууга барганы суроо жаратканын белгиледи.
Мурдагы президент Курманбек Бакиевдин үй-бүлөсү Кыргызстандан 200-300 миллион доллар чыгарып кеткенин алардын финансылык кеңешчиси болгон, Кыргызстанда бир нече кылмыштар боюнча сыртынан соттолгон, азыр АКШда шарттуу абакта отурган Евгений Гуревич “Азаттык” менен маегинде билдирген. Анда Гуревич 2015-жылы Кыргызстандын прокуратурасынын өкүлдөрү Алабамага келип, аны менен жолукканын дагы айтып берген. Бирок ал кыргыз бийлиги андан тышка чыгарыпып кеткен акча тууралуу эч кандай маалымат сураган эмес. (TSh)
