Кыргызстанда 10-сентябрда "Жаштар колдойт" деген ураан менен адам сатууга каршы 100 күндүк маалымат өнөктүгү башталат.
Жаштар иштери, дене тарбия жана спорт агенттиги менен жаштардын отуз уюму бирге уюштуруп жаткан акция 10-декабрга чейин уланат. Ага бир канча эл аралык уюмдар колдоо көрсөтүп жатканы расмий кабарланды.
Адистер элди кыдырып, миграция мыйзамдары, адам сатууга каршы туруу жаатындагы кеп-кеңештерди беришет. Негизги басым сексуалдык кулчулукка каршы турууга жасалат. Мындай иш-чара биринчи жолу 2017-жылы жайында өткөн.
Расмий маалыматтар боюнча, Кыргызстанда бир жылда жарандардын кулчулукка кабылганына байланышкан 8-10 кылмыш иши катталат. Бирок эл аралык уюмдар элдин баары эле укук коргоо органдарына кайрылбай турганын эске салып, адам сатуунун курмандыктары мындан бир нече эсе көп болушу мүмкүндүгүн белгилешет.
Кыргызстандын Кылмыш-жаза кодексинин 124-беренесине ылайык, адам сатуу менен шугулдангандардын мүлкү конфискацияланып, он жылга чейин камалат.
