Кошмо Штаттар маалыматтык технологиялар жаатындагы эки компанияга Пхеньяндын өзөктүк жана ракеталык программаларына колдоо көрсөткөнү үчүн санкция киргизди. Компаниялар Орусияда жана Кытайда жайгашкан.
Санкциялар Кытайдагы "Yanbian Silverstar Network Technology" компаниясына, анын жетекчиси Йонг Сонг Хвага жана Орусиядагы "Volasys Silver Star" ишканасына киргизилди.
13-сентябрда АКШнын финансы министри Стивен Мнучин жаңы чаралар Түндүк Кореяга чет жактагы жасалма структуралар аркылуу кирип жаткан мыйзамсыз акчанын агымын токтотуу үчүн киргизилгенин белгиледи. Ал дүйнөдөгү башка компанияларды да түндүк кореялыктарды арзыбаган акчага кулдай жумшаганды токтотууга чакырды.
Мурдараак Вашингтон Орусияны Түндүк Кореяга салынган эл аралык санкцияларды буйтап өтүп түндүк кореялык жумушчуларга ишке уруксат берип, бул мамлекетке мунай танкерлерин жиберип жатканы үчүн айыптап келген.
Июль айында президент Дональд Трамп Түндүк Кореянын лидери Ким Чен Ын менен Сингапурда жолугушкан. Анда эки тарап Түндүк Кореяны акырындан өзөктүк куралдан арылтуу программасын макулдашкан. Вашингтон анткен менен Пхеньян толугу менен өзөктүк куралдан арылмайынча санкцияларды алуудан баш тарткан.
