Кыргызстан Германия менен тышкы карызды кечүү тууралуу сүйлөшүүдө. Бул тууралуу 4-октябрдагы парламенттин жыйынында финансы министри Адылбек Касымалиев билдирди. Анын айтымында, Германия жыл сайын 13-15 млн. евронун тегерегинде карызды кечип жатат.
- Германия менен бүгүнкү күндө да сүйлөшүүлөр жүрүп жатат. Биз социалдык багытта чыгашабызды көбөйтсөк, алар карызын кечет. Азырынча жыл сайын 13-15 млн. евронун тегерегинде кечип жатат. Мындай сүйлөшүүлөрдү жүргүзүп жатабыз, балким эмдиги жылы да буга жетишебиз.
Финансы министрлигинин маалыматы боюнча Кыргызстандын мамлекеттик карызы 4 415 26 доллар. Анын негизги бөлүгүн тышкы карыз түзөт. Эл аралык уюмдарга жана чет мамлекеттерге карыз 3,5 миллиард доллардан ашат. Соңку маалыматка караганда Кыргызстан Германияга жалпысынан 90 млн. доллар карыз. (КЕ)
