Илбирстин терисин жамынып түшкөн сүрөтү Интернетте талкуу жараткан адам Ош шаарынын тургуну Алымбек Абдыкалыков экени аныкталды. Бул тууралуу бүгүн Айлана-чөйрөнү коргоо жана токой чарба мамлекеттик агенттиги кабарлады.
Абдыкалыков 2014-жылы Москвадан келе жатып Алматыда досунун үйүндө конокто болгонун, сүрөт ошондо тартылганын айтып берди жана өкүнүп жатканын билдирди.
Айлана-чөйрөнү коргоо жана токой чарба мамлекеттик агенттиги Ички иштер министрлиги менен бирге билдирүү таратып, сүрөт алардын WnatsApp номерине келип түшкөнүн, ошол адамды табууга коомчулуктун жардамы керек экенин 11-октябрда билдирген.
Өкмөттүн токтомуна ылайык, 2017-жылдан бери илбирсти мыйзамсыз кармагандарга 1,5 миллион сом айыппул салынат. Кылмыш-жаза кодексинин 278-беренесинде каралгандай, жандыкты туткандар же аткандар эки жылга чейин жатак абакка кесилип, эки жылдан беш жылга чейин эркинен ажыратылышы мүмкүн. (ErN)
