Чүй облусунун аймагында жашыруун иш жүргүзгөн эл аралык террордук уюмдун 9 мүчөсү кармалды. Бул тууралуу Улуттук коопсуздук боюнча мамлекеттик комитет (УКМК) кабарлады.
Кармалгандардын бешөө чет элдик жаран, төртөө Кыргызстандын жарандары. Алар 2017-жылдан бери Сирия менен Ооганстандагы террордук уюмга жоочуларды тартуу жана даярдоо боюнча иш алып барып келишкен. Ошондой эле Кыргызстанда ок атуучу жана жарылуучу заттарды колдонуу менен диверсиялык аракеттерди көрүүгө камынышкан.
Кылмыштуу топтун курамында кармалган чет элдиктер өз өлкөлөрүндө террордук аракеттер үчүн издөөгө жарыяланганы аныкталды. Алар өздөрү баш ийген террордук уюмдун эмиссарларынын тапшырмасы менен Кыргызстанга жөнөтүлүп, жоочуларды тартууга милдеттенме алышкан.
УКМКнын тергөө органдары козголгон кылмыш ишинин алкагында иликтөө иштерин улантууда. Алар чет мамлекеттердин атайын органдары менен кызматташууда. (ErN)
