Казакстандын Жамбыл облустук сотунда мурдагы банкир Ержан Татишевдин өлүмү боюнча айыпталып жаткан бозгундагы саясатчы Мухтар Аблязовду өмүр бою эркинен ажыратуу жазасы суралды.
Жергиликтүү маалымат каражаттарынын кабары боюнча, 22-ноябрдагы сотто прокурор Илияс Ескалиев Аблязовдун Татишевди өлтүрүүнү уюштурганы “толук далилденгенин” билдирген.
Бирок адвокат Жанар Кысыкова Мухтар Аблязовдун күнөөсү далилденген жок деп эсептейт.
Ержан Татишев 2004-жылы окко учуп өлгөн. Ошол кезде сот муну “кокустук” деп атап, банкирдин жанында болгон Муратхан Токмадини бир жылга соттогон. Бирок 2017-жылы бул иш кайра каралып, Муратхан Токмади Татишевди “ТуранАлем” банкын ээлеп алууну көздөгөн Мухтар Аблязовдун тапшырмасы менен өлтүргөнүн айткан. Сот аны быйыл 10,5 жылга соттогон.
Казакстандын Башкы прокуратурасы 4-апрелде Мухтар Аблязовго "банкир Ержан Татишевди" өлтүрүүнү уюштурган" деген айып менен жаңы кылмыш ишин козгогон.
Мухтар Аблязов 2009-жылдан бери чет өлкөдө жашайт жана өзүнө байланышкан бардык иштерди саясий негизде козголгонун айтып жүрөт. Казакстандын соту 2017-жылы да аны “кылмыштуу топ түзгөн", "акча уурдаган" деп 20 жылга соттогон.
Мурдагы банкир жана оппозиционер Мухтар Аблязов президент Нурсултан Назарбаевдин саясатын катуу сындап келатканы белгилүү.
