Өзбекстандын Тышкы иштер министрлиги жакын арада Кыргызстандын Ош шаарында башкы консулдук ачыларын маалымдады. Мындан тышкары, Орусиянын Ростов-на-Дону, Кытайдын Гуанжоу, Казакстандын Актау калааларында да башкы консулдуктар ачылат.
Расмий кабарда кеңселер мамлекеттик сырткы дипломатиялык ишмердикти жандандыруу максатын көздөй турганы белгиленет.
Кыргызстандын түштүк тарабы менен чектешкен Өзбекстандын элчилиги жана консулдугу Бишкекте жайгашкан. Негизинен Ош, Жалал-Абад, Баткен облустарына көп каттаган өзбекстандыктар документ иштерин бүтүрүү үчүн Бишкекке келишет.
