Чүй районунун Бурана айылында көчөдө калган бир жарым жаштагы наристенин ата-энеси табылды. Социалдык өнүгүү министрлигинин басма сөз катчысы Кымбат Кадыралиева окуянын чоо-жайы милиция менен кошо такталып жатканын айтты.
- Баланын туулгандыгы тууралуу күбөлүгү да жок экен. Чүй ооруканасынан Токмоктогу балдардын атайын реабилитациялык борборуна которулду. Документи жасалып бүткөн соң ата-энесине берилет.
Баланы жергиликтүү тургундар өткөн аптада эртең менен жолдон кийимдери салынган баштыгы менен кошо таап алышкан. Милиция наристени ооруканага жеткиргени маалымат каражаттары аркылуу 19-декабрда кабарланган.
Саламаттык сактоо министрлигинин адистери анын ден соолугу жакшы экенин билдиришти.
