Ашраф Ганинин буйругу менен Ооганстандын коопсуздук боюнча Улуттук директоратынын мурдагы башчысы Ассадулла Халид өлкөнүн коргоо министри, ал эми чалгын кызматынын мурдагы башчысы Амрулла Салих ички иштер министри болуп дайындалышты. Алардын талапкерлигин эми Ооганстандын парламентинин төмөнкү палатасы бекитиши керек.
Жогорку кызматка кайрадан дайындалышкан Халид менен Салих мурдагы президент Хамид Карзайдын өкмөтүндө иштешкен. Экөө тең акыркы жылдары “Талибан” кыймылынын күч алуусу үчүн Пакистанды айыпташып, аны “террорго демөөрчүлүк кылган мамлекет" деп жарыялоого да чакырышкан. Халид 2012-жылы Кабулдагы кол салуу учурунда катуу жараат алган.
Күч түзүмдөрүндөгү бул өзгөртүүлөрдүн себеби айтылган жок. Бирок мындан бир нече ай мурда президент Гани ички иштер министри Ваис Ахмад Бармак менен коргоо министри Тарик Шах Бахраминин кызматтан кетүү арыздарын четке каккан. Алардын арыз беришине саясий пикир келишпестиктер себеп болгону кабарланган.
Ооган президентинин жаңы буйругу АКШ азыр Ооганстанда турган 14 миң жоокеринин санын “олуттуу кыскартууну” пландап жатат деген маалыматтар пайда болгон учурга туш келди. Ооганстанда кийинки жылдын апрелинде кезектеги президенттик шайлоо өтөт. (UE)
