Азербайжан келерки жылы Тоолуу Карабах маселеси боюнча Армения менен сүйлөшүүлөрдө жакшы жылыштар болот деп үмүттөнөт. Бул тууралуу азери президенти Илхам Алиев “Россия 24” телеканалындагы маегинде билдирди.
- Армениянын жаңы жетекчилигинин өлкөнү жаңылоо боюнча пландарын ишке ашыруунун жалгыз жолу – Азербайжан менен чырын чечүү экенине терең ишенем. Бул үчүн алар өздөрүнө тиешеси жок жерлерден чыгып кетип, түмөндөгөн азербайжандыктарга өз жерине кайтууга мүмкүнчүлүк бериши керек, - деди Алиев.
Баку менен Ереван 1990-жылдагы Тоолуу Карабах чатагынан бери касташып келатат. Армения колдогон жикчилер 1990-жылдардын башында Азербайжандын негизинен армян улутундагылар байырлаган бул аймагын ээлеп алган. 30 миңдей кишинин өмүрүн алган бул чатакты жөнгө салуу боюнча дипломатиялык аракеттерден азырынча майнап чыга элек.
Армениянын жаңы премьер-министри Никол Пашинян Тоолуу Карабах Азербайжан менен сүйлөшүүлөр жараянынын толук укуктуу мүчөсү болушу керек деп эсептейт. (RK)
