Президент Сооронбай Жээнбеков 15-январда Кыргызстандын футбол боюнча улуттук курама командасынын башкы машыктыруучусу Александр Крестинин менен телефон аркылуу сүйлөштү. Мамлекет башчысы бүгүн, 16-январда Бириккен Араб Эмираттарында боло турган Кыргызстан-Филиппин беттешүүсүнүн алдында кыргызстандык спортчуларга ийгилик каалады.
Анын айтымында, Кыргызстандын футбол боюнча курама командасынын Азия кубогуна катышып жатканы - быйылкы жылдагы эң чоң спорттук окуялардын бири.
- Биздин футболдук команда биринчи жолу ушундай абройлуу чемпионатка катышып жатат. Командага айтып коюңуз, ар бир кыргызстандык сыяктуу мен да биздин команданын күйөрманымын жана сиздердин жеңишиңиздерди каалайм. Алдыда дагы бир матч турат. Ал да абдан маанилүү жана чечүүчү матч болуп саналат. Биз командабызга чын ниеттен ишенебиз, - деди Жээнбеков.
Футбол боюнча Кыргызстандын курама командасы менен Филиппиндин беттеши Бишкек убактысы боюнча саат 19.30да башталат. (SDz)
