Бул тууралуу “Азаттыкка” Баткен шаарынын мэриясы билдирди. Расмий кабарга ылайык, шаар боюнча жакындары чет өлкөгө иштегени кеткен 722 бала такталды. Эми алардын канчасы мектеп жашына чейинки балдар экени, канчасынын ата-энесинин экөө тең же бири четке кеткени такталууда.
Аймакта атайын штаб түзүлүп, курамына ар тармактын өкүлдөрү кирген комиссия ата-энеси миграциядагы балдардын жашоо шарты менен таанышып, так маалымат даярдоо максатында үймө-үй кыдыра баштаган. Үймө-үй кыдырып, балдардын эсебин тактап, атайын база түзүү иш-чаралары башка аймактарда да жүрүп жатат.
Укук коргоо кызматтарынын маалыматында Баткен облусунун аймагында мектеп жашындагы 15 миңден ашык баланын ата-энеси миграцияда экени айтылып жүрөт. Эмгек жана социалдык өнүгүү министрлигинин эсебинде ата-энеси миграцияда жүргөн балдардын саны Кыргызстан боюнча 175 миңдин тегерегинде.
Ал эми укук коргоочулар ата-энеси чет жакта иштеп жүргөн 256 миң бала бар экенин, алардын ичинен 119 миң баланын ата-энеси миграцияда жүрүшкөнүн айтып жатышат.
Кыргызстандын аймактарында мигранттардын туугандарында жана тааныштарында калган балдар зомбулукка кабылган учурлар катталган. (JsA)
