Орус совет республикасынын эл артисти, актер, режиссер жана акын Сергей Юрский 83 жашында дүйнөдөн кайтты. Артисттин кызы ал көптөн бери ооруп жүргөнүн, жүрөгү токтоп каза болгонун журналисттерге билдирди.
Сергей Юрский 1935-жылы Ленинградда туулган. 1978-жылдан бери Москвада жашап, Моссовет театрында иштеген. Кийин аны жетектеп калган. 1957-жылдан бери киного тартылып, элүүдөй роль ойногон.
Юрский активдүү жарандык позициясын билдирип, аксакалдык сөзүн айтып келди. Бир канча ирет сөз эркиндигин кысмакка алууга каршы чыгып, Чеченстандагы согушту токтотууга чакырып келген.
Актер саясий негизде камалгандарды бошотууну талап кылып, "репрессиялык саясат менен сталинизмге кайтып жатат" деп бийликти айыптап жүргөн. Ошондой эле Кремлдин Украинага карата саясатын да сындап жүрчү.
