Кыргызстан социал-демократиялык партиясы (КСДП) жаңылана баштаганын билдирди. Партиянын басма сөз кызматынын маалыматына караганда, бүгүн 21-февралда анын төрагасы Алмазбек Атамбаев комитеттер тууралуу жобого кол койду. Жалпысынан партиялык ишмердүүлүккө байланыштуу жети комитет жана бир кеңеш түзүлдү.
КСДПны негиздегендердин бири мурдагы президент Алмазбек Атамбаев болгон, азыр ал анын төрагасы.
Өзүн "КСДПнын мүчөсүмүн" деп атаган Сагынбек Абдрахманов Бишкектин бир катар райондорунда жана облустарда "Атамбаевсиз КСДП" деген ураан менен жыйындарды уюштуруп жүрөт.
Былтыр журналисттердин суроосуна жооп берип жатып Атамбаев азыркы президент Сооронбай Жээнбековду “эски бийликтин жолоюна түшүп, үй-бүлөлүк башкарууга жол берип жатат” деп сындаган.
Кийин Жээнбеков Атамбаев тууралуу "ал үчүнчү кишилер аркылуу мени жетеленме жетекчи кылып, менин аракеттеримди башкарып тургусу келген” деп айткан. (RK)
