Дүйнөдө улгайган адамдардын катары калыңдаган сайын шаар тургундары да көбөйүп баратат. Бул тууралуу Бириккен Улуттар Уюмунун (БУУ) Калк жана өнүгүү боюнча комиссиясынын баяндамасында айтылат. Комиссиянын сессиясы дүйшөмбүдө Нью-Йоркто башталды.
Жогоруда айтылган демографиялык процесстер бир топ өлкөлөрдө айлана-чөйрөгө оор жүк болуп, экономикалык, социалдык мүшкүлдөргө себеп болууда.
БУУнун маалыматына ылайык, акыркы 25 жылда дүйнөдө өмүрдүн орточо узундугу 64,9 жаштан 72,3 жашка чейин жетти. 2050-жылга карай болжол менен дагы эки жаш кошулмакчы.
БУУнун критерийлеринде «улгайган» деп 65 жаштан ашкан адамдар эсептелет. Европада быйыл алардын саны 19%, Түндүк Америкада 16% түздү.
2050-жылга карай Европада 28%, Түндүк Америкада 23% болмокчу.
Улгайган адамдардын көбөйүшү соңку 25 жылда жакырчылыкта жашагандардын азайышына, энелердин өлүмүнүн кыскарышына жана элдин жашоо деңгээлинин жакшырышына байланыштуу экени белгиленет.
